Балаҕан ыйын 25 - алтынньы 5 күннэригэр Сочига нуучча дуобатыгар Бүтүн Россиятааҕы күрэх буолан ааста. Бу күрэххэ Архангельскай, Тюменьскай, Ростовскай, Челябинскай, Пермскай, Калининградскай, Екатеринбурскай, Самарскай, Тверскай, Московскай, Кировскай, Иркутскай, Нижегородскай, Волгорадскай уобаластартан, Красноярскай кыраайтан, Ханты-Мансийскай уонна Саха республикаларыттан эдэр кэскиллээх дуобаччыттар кэлэн кыттыыны ыллылар. Саха Сириттэн  Хаҥалас улууһун Төхтүр орто оскуолатыттан Контоева Леона, Руфова Дайаана, Сидоров Байдам (6 кылаас), Павлова Валя (7 кылаас), Капустин Афоня, Николаева Ксения (11 кылаас) уонна Өктөм лийейиттэн Винокуров Ким (6 кылаас) оскуола дириэктэрэ Соломонов Александр Степанович салайааччылаах ситиһиилээхтик кыттан кэллибит. Ол курдук, 2014 сылга республикаҕа 1998 – 2000 сыллаах оҕолорго нуучча дуобатыгар уонна 100 харахтаах дуобакка чемпионатын боруонса призердара спорт маастарыгар кандидат Афанасий Капустин түргэн оонньууга бастакы, сүрүн уонна молниеноснай оонньууларга иккис миэстэлэри; иккис разрядтаах Николаева Ксения үс көрүҥҥэ үһүөннэригэр туһааннааҕынан иккис уонна үһүс миэстэлэри; кыра саастаах оҕолорго түргэн оонньууга Контоева Леона үһүс миэстэни ылары ситистилэр. Атын да дуобаччыттарбыт бэйэлэрин таһымнарыгар үчүгэй оонньуулары көрдөрдүлэр. Маны сэргэ улахан дьоҥҥо нуучча дуобатыгар Россия чемпионата, сүүс харахтаах дуобакка Россия кубога ыытылынна. Бу күрэхтэргэ Саха Сириттэн биллиилээх спортсменнар Николай Гуляев, Василий Прокопьев, Саина Попова, Валерия Карманова (нуучча дубатыгар), Лена, Аяника Кычкиналар, Анна Чупрова, Айсен Андреев, Антон Пермяков кытыннылар уонна чаҕылхай ситиһиилэннилэр.

Күрэхтэһии АкваЛоо пансионакка тэриллэн ыытылынна. Иккилии миэстэлээх, толору хааччыллыылаах нүөмэрдэргэ түһэрдилэр, күҥҥэ үстэ аһаталлар (тугу баҕарбыккын, төһөнү баҕар). Аны туран күҥҥэ биир партияны оонньотоллор, эбиэттэн киэһэ муораҕа дуоһуйа сөтүө, Хара муораҕа биллэр Лоо Аквапааркаҕа, араас экскурсиялар. Ол курдук олимпийскай паркаҕа киэһээҥҥи араас уотунан оонньуур фонтаны көрдүбүт, аатырбыт Ривьера пааркаҕа күүлэйдээтибит, Ахун хайаҕа тахсан Сочины, муораны былыт үрдүттэн көрдүбүт, Мацеста эмтээх уу тахсар сиригэр, муора пуордугар, Моремолл атыы – сынньалаҥ киинигэр сырыттыбыт.

Күрэхтэһиилэр кэмнэригэр араас сиртэн кэлбит оҕолору кытары билистибит, элбэҕи биллибит – көрдүбүт, тренербит этэринэн дуобаттыыр таһыммыт үрдээбит.

Манна барытыгар күүс – көмө буолбут улуус интеллектуальнай оонньууларга федерациятын председателигэр Кононов Родион Дмитриевичка, Ил Түмэн депутатыгар Мамедов Алиш Забитовичка, төрөппүттэрбитигэр, салайан илдьэ сылдьыбыт оскуолабыт директорыгар Соломонов Александр Степановичка барҕа махталбытын хаһыат нөҥүө тиэрдэбит.

Төхтүр оскуолатын үөрэнээччилэрэ Контоева Леона, Руфова Дайаана, Павлова Валя